Pore v Pasvu

JUJMEN

LOCMAR KASTOM GRAON

KOMPOSISON BLONG KOT

Long Amendmen Act No.35 blong 1989, Parlemen e bin pasem se anda long seksen 2 blong Aelan Kot Act, CAP 167, taem we Aelan Kot e sitaon blong harem dispiut long lan bae wan Magistret e mas sitaon wetem trifala Aelan Kot Jastisis. Anda long seksen 2(a) blong Act ia, wan Magistret olsem bae ino save sitaon sapos Jif Jastis ino kivim authoriti long hem. Folem hemia Kot e wandem talem long ol patis se olgeta we oli deal wetem kes blong Locmar land oli qualifae evri wan.

BACKRAON BLONG KES

Original Klemen Famili JOHN PORE e pem fee mo filem klem blong hem long yia 2000 ova long wan kastom graon we e stap long East Santo. Nem blong graon ia hemi LOCMAR. Santo / Malo Aelan Kot Klerk e putum aot pablik notis blong dispiut area long yia 2000.

Philip Pasvu kaonta klemen 1 e registerem klem blong hem long 2000.

Long wan tele-conference blong 10 Okis 2020 taem we Kot e harem tufala patis ia, olgeta nara patis we oli no filem klem blong olgeta long kes ia oli mekem aplikesen blong join olsem parti. Kot e akseptem aplikensen blong everi wan blong mekem e fair blong eni man we e ting se hem e gat raet long graon ia Locmar bae Kot e mas harem hem.

KASTOM BLONG ERIA WE LOCMAR KASTOM GRAON E STAP LONG HEM

Long area we dispiut istap long hemi oli folem bladlaen.
Kastom blong Nekep e apply long area we Locmar e stap long hem sei:

(a) Kastomeri land onaship hem e folem patrilineal system;
(b) Adoption;
(c) Exception long rule blong patrilineal. Woman e save tekem raet ia sipos e nomo gat bladline blong man istap;
(d) Natorok (will).

KES BLONG ORIGINAL KLEMEN – JOHN PORE

BASIS BLONG KLEM BLONG HEM.

-Hemi klem kastom onaship blong Warthele.

- Fes occupancy mo kastom land tenure emi start long Warthele ikam kasem olgeta descendants blong hem.

-Hemi klem folem bladline blo man.

PRESENTESEN BLONG KLEM

Spokesman blong John Pore hemi John Kath. Hem e pikinini blong John Pore. Klem blong hem e start wetem Warthele we hem nao e lukaotem mo ownem graon. Warthele yet emi givim graon long ol man blong oli wok long hem. Nating se Jif Mel Alick Win hemi givim graon long ol man long taem blong Christianity. John Pore nao hem e bladline descendants blong Warthele nao hemi klem graon ia Locmar. Ol man andap long hill long North, South mo West oli kam daon long coastland from Christianity. Inogat man e liv long Coastline before skul e kam. John Pore e klem long top blong hill long graon Locmar kasem solwota.

Warthele hem e maretem Nwaret mo tufala e gat tu pikinini boe. Nem blong tufala hemi Korwar mo Kath. Korwar hem e maretem Kiath. Tufala e nogat pikinini. Kath e maretem Arset e gat wan boe. Nem blong boe ia John Pore. Long taem blong Korwar wetem Kath, tufala e givim graon long famili Saul Tarr blong usum blong mekem garen long second flat ples we kokonas blong Saul Tarr e stap lo hem. Agrimen ia oli mekem long kastom. Saul Tarr e givim pig long tufala olfala ia nao Saul Tarr e usum graon ia blong planem coconuts wetem garen. Taem Saul Tarr e wantem blong go bak long Lathi, John Pore e givim bak pig blong Saul Tarr. John Pore oli berem hem long Locmar.

EVIDENCES.

Witness No.1 –Killion Standly. Hem e tawian blong John Kath. Hem e stap liv wetem olgeta family blong hem andap kolosap long ples blong John Pore. Hem e talem se John Pore e talem long hem se graon blong hem e stap andap long hill go kasem solwota. Locmar e minim plante whitewood.

Witness No.2 – Tiwok Saul. Hemi blong area blong Lathi but hemi kam liv long graon blong Locmar sins olgeta papa blong John Pore oli laef yet. Hemi talem se olgeta bubu blong hem oli bin askem long Korwar mo Kath blong oli usum graon blong mekem garen. Bubu blong Saul Tarr oli givim pig long Korwar mo Kath blong usum graon we oli wok long hem. Fasin ia lo kastom hem e shoem respect blong usum graon afta sipos man e wantem tekem bak graon ia bambae e givim bak pig blong nara man. Olgeta bubu blong hem oli singaotem graon we oli wok long hem Vatngahentuc we e stap long Locmar. Locmar e minim fulap whitewood.

Hiva e kasem sik Leprosy mekem sei hem e go stap wetem Pastor David from hem e Uncle blong woman ia Bokarkar. Bokarkar hem e namba 3 woman Pastor David. Sekondary skul e stap lo graon ia L’Avatao.

Witness No.3 – Talper Nial. Kiat we hem e woman blong Korwar e tekem aot hem long mama blong hem long 6 deis afta hem e bon. Taem Kath hem e ded, olgeta pikinini blong hem oli smolsmol mekem nao Korwar e tekem olgeta e kam mo lukaotem olgeta. Korwar e luk John Pore olsem fes bon boe blong hem folem kastom. Korwar e no shoem baonderi blong Locmar long hem be John Pore nomo. Jif Mel e wok kolosap lo skul area. Bifo Mel nomo hem e plantem coconut lo area ia.

Witness No.4 – Eddie James. Mark Alick hem e boe blong Jif Mel Alick Win. Mark Alick e givim graon long papa blong Eddie James. Graon ia e stap long Losur hemia long wan graon aotside long Locmar. Grave blong Korwar e stap long Loveluth. Kastom graon e save stop lo hill nomo mo no kasem solwota.

KES BLONG KAONTA KLEMEN– PHILIP PASVU

BASIS BLONG KLEM BLONG HEM.

-Hemi klem kastom onaship blong Hiva we e uncle blong Pastor David.

- Fes occupancy mo kastom land Tenure emi start long Hiva e kam kasem olgeta descendants blong hem.

-Hemi klem folem bladline blo man.

PRESENTESEN BLONG KLEM.

Kanota Klemen 1 hemi Philip Pasvu. Klem blong hem e start wetem Pastor David. Hiva hemi uncle blong Pastor David. Pastor David hem e fes Pastor long North kasem East long 1887 - 1962. Long taem ia ol man oli kam andap long hill from Christianity oli go stap liv long Hog Harbour. Nogat ples blong wok nao oli askem long Pastor David. Pastor David e askem long Hiva uncle blong hem sapos oli givim sam graon long ol new comers ia blong oli wok long hem blong mekem garen mo planem kokonas. Hiva wetem Pastor David oli agri blong givim graon long olgeta folem agrimen blong olgeta missionaries be oli no pem graon. Graon ia Pastor David wetem Hiva oli givim long gudfala fasin nomo. Olgeta man long East Santo oli gat agrimen wetem olgeta man Ambae blong man long Hog Harbour oli givim pig long man Ambae mo man Ambae e givim kokonas long man East blong planem. Long taem ia Hiva wetem Pastor David oli salem graon nomo long Jif Mel Alick, Nevre wetem Mr. Warden wan man Australia. Taem Pastor David e harem se Hiva e salem graon long Jif Mel Alick nao Pastor David e tok long Hiva nao Hiva e ronwe e go stap wetem Jif Mel Alick. Taem missionaries oli mekem Pastor David e kam assistant jif long Jif Mel Alick nao Jif Mel Alick e putum bak Hiva e go stap wetem Pastor David bagegen. Hiva e salem haf graon blong hem lo Jif Mel. Klem blong graon ia folem Pastor David we hem e uncle blong Hiva. Klem blong Pasvu e stat long ples we Saul Tarr e wok long hem long namba 2 flat ples kasem solwota.

Hiva e uncle blong Pastor David. Pastor David e maretem Meriam olsem namba fo (4 ) woman blong hem. Tufala e gat gat tu pikinini boe. Nem blong tufala hemi D. Iaswel mo P. Pasvu folem family tree blong hem. Tiwok Saul hem e family wetem hem. L’Avatao e karem nem blong hem long wan Natapoa we wan devel e stap insaed long hem. Mama blong hem e planem Namele leaf we e stap long graon ia yet mo e markem baonderi blong L’Avatao. Kastom graon ia Locmar wetem L’Avatao e karem nem blong ol wud. Lothrath ino wan graon be e wan ples nomo. Lothrath e minim flat ples long second hill long Locmar graon. Papa blong hem bifo hem e ded e mekem wan will mo e givim graon long olgeta pikinini blong hem. Long will ia e nogat graon ia we e stap long Locmar graon. Mission haus we hem e stap tokbaot e stap outside long map blong Locmar. L’Avatao e baonderi wetem Locmar.

EVIDENCES.

Witness No.1 –Jif Namser Iako. Hem e talem se Pastor David e maretem Lesa olsem fes woman blong hem. Pastor David wetem Lesa tufala e bonem Besi we e mama blong Jif Namser Iako. Besi e lukaotem Hiva kasem Hiva e ded. Pastor David e givim wan pis graon long Besi taem Besi e wan yang gel. Hemia from Besi hem e lukaotem Hiva kasem hem e ded. Folem kastom fasin blong Nekep hemia hem e Natorok. Samting we man e ded e givim long wan nara man bambae olgeta descendant blong man ia e no save tekem bak taem man ia e ded. Graon we Hiva e salem long Jif Mel Alick e stap long L’Avatao. L’Avatao e no stap insaed long Locmar. Pasvu mo hem tufala e gat wan papa nomo be tufala igat different mama. Jif Mel oli berem hem long graon kolosap long solwota.

Witness No.2 – Yang Yako. Hem e talem sei long North graon blong hem e baonderi wetem graon blong Hiva. Graon e stat long wan stone we e gat wota long hem mo e go kasem andap long hill. Graon we hem e stap long hem e stap aotside long Locmar. Hem e harem stori se Hiva e salem graon ia long Jif Mel Alick.

Witness No.3 – Sam Wass. Hem e talem se graon we Mel e pem long Hiva e stap insaed long area blong L’Avatao. Hem e gat graon be e stap aotside long baonderi blong Locmar.

KES BLONG KAONTA KLEMEN 2 – ROMEL ALICK MO FAMILI

BASIS BLONG KLEM BLONG HEM.

-Hemi klem graon we Jif Mel Alick Win e pem long Hiva.
- Occupancy mo kastom land tenure emi start long Jif Mel Alick Win e kam kasem olgeta descendants blong hem.

-Hemi klem folem bladline blo man.

PRESENTESEN BLONG KLEM

Spokeman blong Jif Mel Alick Win hemi Romel Alick. Hem e bubu blong Jif Mel Alick Win. Klem blong hem e start wetem Jif Mel Alick Win. Jif Mel hem e kam long bush. Hem e kam daon blong go wok long Queensland blong katem suga kane from hem wetem papa blong hem oli wantem pem wan masket. Hem e bin go long Queensland e wok mo hem e kasem mani nao hem e kam bak long Hog Harbour. Hem e stap wetem olgeta missionaries. Wan olfala man nem blong Hiva e bin kam luk Jif Mel Alick mo askem help blong hem. Hiva e talem long Jif Mel Alick se hem e bin tekem sam pig mo hem e nogat pig blong givim bak. Hem e askem Jif Mel blong helpem hem. Jif Mel e tekem mani we hem e go wok from long Queensland nao e givim long Hiva. Mani ia hemi twelve pound sterling mo six gold pound. Hiva e tekem mani ia. Hiva e talem long Jif Mel sei forom we hem e nogat pikinini nao bae hem e givim raet blong hem long wan graon igo long Jif Mel. Hiva e tekem Jif Mel igo shoem graon blong hem mo talem long hem se graon ia e blong Jif Mel wetem ol bubu blong hem. Long taem we Hiva e shoem graon ia e gat 3 witness e stap blong witnesem toktok ia. Olgeta witness ia igat olfala Nev Rec, olfala Ro Pre mo olfala Warele Kri. Pastor David e no stopem Hiva taem hem e salem graon long Jif Mel, taem Jif Mel mo Hiva e givim graon long ol man Pastor David e no dispiutem tufala. John Pore e dispiutem Jif Mel nomo long village kot taem skul e kam stap long L’Avatao. Hiva egat wan stone blong Nmant Lath nao taem Jif Mel e karem graon ia Hiva e talem long hem olgeta fasin blong no mekem blong Nmant Lath e no hapi. Grave blong Jif Mel wetem Mark Alick e stap kolosap long solwota. Yatha e baonderi wetem L’Avatao mo long West Lotcurn e baonderi wetem hem. Jif Mel e pem graon insaed long L’Avatao e no insaed long Locmar.

EVIDENCES.

Witness No.1 –Jif Kalmasei Warsal. Hem e talem se John Pore e bin askem village kot blong lukluk long graon ia L’Avatao we skul e stap long hem. Pastor David e maretem Lesa olsem fes woman blong hem. John Pore e no askem village kot blong sitdaon long Locmar graon. Village kot hem e finem se John Pore hem e nogat proof long graon ia L’Avatao mekem village Kot ia e givim graon ia long Mark Alick wei hem e papa blong Romel Alick. Afta long Kot ia, John Pore e kam putum klem blong Locmar we e kasem solwota. Long kastom blong Nekep taem e gat agrimen olsem Hiva wetem Jif Mel e mekem bambae e nogat wan man e save karem bak graon ia. Nmant Lath hem e blong Hiva be taem Jif Mel e tekem graon ia Nmant Lath e blong Jif Mel.

Witness No.2 – Joel Path. Hem e talem sei long North kastom graon we nem blong hem Yatha e baonderi wetem L’Avatao. Hem e harem se Hiva e salem graon ia long Jif Mel Alick. Long 1999, Mark Alick e givim graon long Government blong kam putum skul long ples we skul e stap long hem. Ples we skul e stap lo hem naoia bifo hem e ples blong fanis blong buluk blong Jif Mel.

Witness No.3 – Jif Manasei Vocor. Hem e talem se Mel hem e stap wok long ples we Kavman e putum skul long hem. Locmar graon e stop long hill nomo e no kasem skul.

Witness No.4 – Jif Kavcor Wass. Hem e talem se Mel e pem graon ia L’Avatao long Hiva long 1919. Fasin we Hiva e mekem wetem Jif Mel long kastom blong Nekep hemia e wan Natorok. Fasin blong agrimen blong mani wetem graon ia e stap long taem finis e kam. Nogat wan man e toktok forom. Olgeta bubu blong Hiva e no save klem graon ia naoia folem fasin blong Natorok. Dispiut blong graon e kam nomo afta we Kavman e putum skul long graon ia.

KES BLONG KAONTA KLEMEN 3– KET WARPOKPOK

BASIS BLONG KLEM BLONG HEM.

-Hemi klem kastom onaship blong Jif Ietkil.

- Occupancy mo kastom land tenure emi start long Jif Ietkil e kam kasem olgeta descendants blong hem.

-Hemi klem folem bladline blo man.

PRESENTESEN BLONG KLEM.

Spokeman blong Ket Warpocpoc hemi Rex Warpocpoc. Klem blong hem e start wetem Jif Ietkil. Jif Ietkil e stap long ples ia L’Avatao bifo ol missionaries oli kam long Hog Harbor. Jif Ietkil e maretem Keat mo tufala e gat tu pikinini. Wan boe mo wan gel. Boe nem blong hem Hiva we e salem graon long Jif Mel. Hiva e nogat pikinini kasem hem e ded.
Keat e maretem Ket mo tufala e gat fo (4) pikinini. Iath, Ietkil, Ure mo Warpocpoc. Ietkil mo Ure tufala e no maret mo nogat pikinini nao tufala e ded.
Iath e maretem Arurkor mo tufala e gat Arovre mo Bokarkar. Arovre e maretem Ruben mo tufala e gat tu pikinini. Nem blong tufala hemi Tomas Ruben wetem Samsen. Tomas Ruben e maretem Telma mo tufala e gat tu pikinini nem blong tufala hemi Ruben mo Sero. Samsen e maretem Wacte. Tufala e gat six pikinini mo nem blong olgeta Nikolsen, Jevry, Kensi, Silva, Tain mo Brus. Bokarkar e maretem Pastor David. Tufala e gat wan pikinini gel nem blong hem Arcove. Arcove e maretem Anlan. Tufala e gat five pikinini. Nem blong olgeta Okis Kor, Thakol, Wass Bavel, War Nla mo Iavro.

Nara pikinini blong Keiat wetem Ket we nem blong hem Warpocpoc e maretem Arvulvul mo tufala e gat five pikinini. Nem blong olgeta pikinini blong tufala hemi Sapo Keiat. Sapo Keiat hem e no maret mo e nogat pikinini. Keiat (3) e maretem Rovu mo tufala e gat ten pikinini. Nem blong olgeta hemi Wilsen, Benjamin, Alan War, Arsu, Timi, Steven, Arvulvul, Kreka, Ana mo Jenita. Ket (2) e maretem Velevus mo tufala e gat six pikinini. Nem blong olgeta hemi Jason, Arvulvul, Linda, Rex, Helen mo Anie. Armohov e maretem Kal Wass mo tufala e gat tu (2) pikinini. Nem blong tufala Meriam mo Ister. Meriam e martem Willie mo tufala e gat tri pikinini. Nem blong olgeta Philip, Monic mo Esi. Ister e maretem Warsal mo tufala e gat five pikinini. Nem blong olgeta hemi Peter, Tery, Rovea, Yuna mo Lina. Merwell gel blong Warpocpoc e maretem Iavcuth mo tufala e gat seven pikinini. Nem blong olgeta hemi Sande, Kenet, Jona, Warele, Luke, Joshina mo Nerry.

Klem blong Warpocpoc e folem Keiat (2). Keiat (2) hemi gel blong Keiat (1) we e maretem Jif Ietkil. Jif Ietkul hem e gat kastom identity long graon ia Witateteno. Igat stone we igat fo (4) eye long hem, nakamal blong Jif Ietkul, ples blong Nmant Lath wan devel we e stap wok long graon ia, stone we e gat healing wota long hem we nem long kastom hem e Thukieth. Olgeta grave blong ol bubu wetem Papa blong hem e stap andap long L’Avatao kolosap lo skul. Papa blong hem e ded long 2018 nao oli berem hem kolosap long skul wetem olgeta bubu blong hem. Graon ia nem blong hem e Witateteno ino L’Avatao olsem we descendant blong Jif Mel Alick stap talem long Kot.

EVIDENCES.

Witness No.1 – Jif Kaven Kuvu. Hem e talem se Jif Ietkill ples blong hem istap long Witateteno. Nem blong graon we Skul e stap long hem e no L’Avatao. Hem e Witateteno. Witateteno e minim graon. Hem e talem aot family tri blong Kaonta Klemen 3. Pastor David e berem Hiva from hem e pastor blong Hog Harbour long taem ia mo Hiva hem e uncle blong Bokarkar. Hiva hem e sik nao hem e ded mo Pastor David e berem hem long mission graon. Bokarkar wetem Pastor David tufala e gat wan (1) pikinini we nem blong hem Arcove. Hiva e nogat pikinini. Hiva e gat wan sista we nem blong hem Kieat. Pikinini blong Jif Ietkul e gat Hiva mo Keiat nomo. Baonderi blong Locmar e stap nomo andap long hill.

KES BLONG KAONTA KLEMEN 4 – FAMILI WARPUT MO TIMMY

BASIS BLONG KLEM BLONG HEM.

-Hemi klem kastom onaship blong Vutlath.
- Occupancy mo kastom land tenure emi start long Vutlath e kam kasem olgeta descendants blong hem.

-Hemi klem folem bladline blo woman.

PRESENTESEN BLONG KLEM

Spokeman blong Artucuth hemi Vocor Warput Klem blong hem e start wetem Vutlath. Hiva hem e family blong Bokakar e no blong Pastor David. Vutlath hem wan nomo hemi gat kraon long ples we e stap long Kot. Taem Hiva e salem graon long Jif Mel Alick nao olfala Tomker e talem lo aot lo bubu blong hem Nathrit. Nathrit e tok strong lo Pastor David bladline blo Pasvu. Tufala pikinini blong Pastor David we nem blong tufala hemi Pesi wetem Thul tufala e fulumap ol klos blong Hiva mo tufala e tok strong long Hiva blong go stap wetem Jif Mel Alick. Family tree blong Kaonta Klemen 4 e talem se Nere nao hemi stampa blong smol aelan ia Latheau. Hem e maretem Maredem Kogar blong Lohevatur (Lohevatoir). Tufala e gat wan boe nem blong hem Tecuth. Tecuth e maretem Nwarsekra gel blong vuster Vutlath blong Ivadau mo tufala e gat wan boe. Nem blong hem Vutlath. Vutlath e maretem Kreiur sista blong Gorsek blong Votgakar nao tufala e gat wan pikinini mo nem blong hem Nkenrelrel. Nkenrelrel e maretem Nwarticuth. Gel blong Gorsek mo tufala e gat fo (4) pikinini. Nem blong olgeta hemi Gos, Warkuvu, Tacneli mo Arti. Gos, Warkuvu mo Tacneli oli ded oli no gat pikinini. Arti e maretem Nathrit. Tufala e gat fo (4) pikinini. Nem blong olgeta Timmy, Thigaru, Nwarmeren mo Warput. Timmy pikinini blong hem igat Thigaru, Rovu, Koser, Nwarmerem. Nwarmerem e bonem Jonah. Warput e bonem Sapo, Philimon, Vocor mo Robert. Kastom identity blong hem e gat ples blong Nmant Lath, nakamal, Pasis mo stamba blong Natapoa we L’Avatao e stap long hem. Hiva e uncle blong woman ia we Pastor David e maretem.

EVIDENCES.

Witness No.1 –Jif Ben Nkenrelrel. Hem e talem se graon ia nem blong hem naoia hem e Locmar. Bifo e gat nara nem. Hiva hem e blong Lorien long South Sara. Kastom blong Nekep nomo man e save tekem graon long bladline, adoption mo Natorok.

Witness No.2 – Philimon Warput. Hem e talem se L’Avatao e wan different graon long Lotcurn o Locmar. Pasvu e bin kam askem history long papa blong Philimon Warput. Histori we Pasvu hem e stap talem long Kot e no histori we papa blong Philimon Warput e talem long hem. Stret histori blong olgeta nao hemia we Famili Warput mo Timmy stap talem long Kot. Long kastom blong East graon man e save gat long bladline, adoption wetem fasin blong Natorok. Ol kastom mark blong baonderi hem e crik, hill, wetem wud. Jif Mel Alick e pem graon long l’Avatao.

KES BLONG KAONTA KLEMEN 5– FAMILI IARCUT MO NOEL

BASIS BLONG KLEM BLONG HEM.

-Hemi klem kastom onaship blong Avurvur.
- Occupancy mo kastom land tenure emi start long Avurvur e kam kasem olgeta descendants blong hem.

-Hemi klem folem bladline blo woman.

PRESENTESEN BLONG KLEM.

Spokesman blong Iarcut Noel hem e Thucula Noel. Klem blong hem e start wetem Arvurvur. Avurvur e maretem Warele. Kor wetem Cere tufala e askem graon blong wok lo hem lo brata blong Rovu we nem blong hem Thingaru. Afta we hem e talem long tufala Kor e wok lo half graon mo Cere e wok long half. Tufala ia e wok lo graon afta naoia tufala e klem kastom onaship blong graon Locmar we bifo nem blong graon ia hem e Lotcurn. John Pore hemi descendant blong tufala mekem John Pore e no save baonderi blong graon ia. Jif Sorsor e gat 2 gel. Hemia Kuru wetem Areni. Kuru e maretem Jif Reservuvur blong Locmar mo tufala e gat tri pikinini nem blong olgeta Arvurvur, Knes mo wan boe nem blong Kufu. Kufu wetem Knes tufala e nogat pikinini. Arvurvur e maretem Warele mo tufala e gat 2 pikinini boe. Nem blong tufala hemi Noel mo Iavuth. Noel e bonem seven pikinini. Nem blong olgeta hemi John, Arvurvur, Ameren, Thukula, Susan, Knes, Jessie mo Kuvu. Iavcuth e gat six pikinini. Nem blong olgeta Sandy, Keneth, Jonah, Luke, Nerry, Josina mo Warele. History blong hem igat tri man e storian long hem. Graon ia e blong Jif Reservuvur. Olgeta kastom identity blong hem everi wan oli destroyem.

EVIDENCES.

Witness No.1 –Jif John Warsal. Hem e talem se graon ia e stap insaed long graon ia Lotcurn. Locmar e stop nomo andap long hill from papa blong hem e talem long hem. Locmar e stop nomo long ples we Saul Tarr e bin wok long hem long namba tu flat ples long Locmar.

WOKBAOT LONG GRAON WETEM OLGETA PATIS

Long wokbaot blong Kot wetem olgeta patis John Kath hem e shoem Nangai we e stap andap long fenis blong buluk blong hem kasem long last Nangai we e stap long nara end mo tufala wud ia e baonderi wetem Seri Tu. Hem e shoem wan olfala Namele tri we e foldaon nao hem e talem se Namele tri ia e stap kolosap long nakamal blong bubu blong John Pore. Hem e shoem grave blong John Pore long Locmar. Noel Thukula e no dispiutem mark ia. Olgeta nara patis oli no dispiutem tu forom oli no klem graon andap long hill.

Noel Thukula mo John Kath e shoem wan ples blong Hivo. John Kath hem e talem gud fasin blong Hivo se Hivo e two man wan white man mo wan black wan. White wan e save changem hem blong kilim man mo tufala e save kam snake. Lo ples ia man e save finem white mo black snake we hemia nao Hivo. Noel e no save talem gud story blong Hivo. Noel e shoem wan ples mo talem se nakamal e stap long ples ia be ino gat eni kastom mak blong hem. Hem e no shoem eni grave blong olgeta bubu blong hem insaed long Locmar. John Kath e shoem ples we Saul Tarr e wok long hem mo hemia Noel e no dispiutem.

Pasvu ino save shoem Namele tri blong hem from e stap aotside long Locmar graon. Pasvu wetem Timmy oli shoem wan smol hill nao e talem se hemia baonderi blong Locmar. Noel, John Kath, Rex Warpokpok e talem se baonderi blong Locmar e stop long second flat ples long Locmar wei hem e baonderi wetem graon we skul e stap long hem.

Long area we title blong skul e stap long hem, John Kath e no shoem eni kastom identity blong hem kasem solwota. Philip Pasvu e shoem wan stone we hem e talem se stone ia Hiva usum blong pem graon long Jif Mel Alick Win. Romel hem e agri wetem toktok ia. Rex Warpocpoc e challengem stone mo talem se Hiva igo luk Jif Mel long Hogharbour nao Jif Mel e givim mani long hem. Noel e nogat kastom identity blong hem from klem blong hem e no kasem area ia.
Romel Alick e shoem olfala fenis blong Jif Mel we istap narasaed long Koltar road, olgeta stone we Jif Mel e usum blong fenis pig blong hem kolosap long solwota, mo nogat man e dispiutem grave blong Jif Mel Alick mo Mark Alick we istap daon lo solwota mo pasis we hem e klem. Romel e no shoem stone blong Nmant Lath.

Rex Warpocpoc e shoem stone blong healing wota we oli kolem Thukieth, tabu stone we e gat fo (4) eye mo nem blong stone ia Yethina we hem e minim stone blong security, nakamal blong Jif Ietkul we tede dormitory blong ol gel. Hem e talem se doa blong nakamal ia e lukuk e go daon long Thukieth (healing wota) afta spirit blong wota ia e go pass wetem Yethina we hem nao e sekurim area ia. Everi pasis hem e blong Jif Ietkul. Vatakalke hem e Natapoa we devel e stap insaed long hem.

Everi parti we oli klem area blong skul oli agri long ples we Nmant Lath istap wok long hem.

Vocor Warput spokesman blong Famili Warput mo Timmy oli shoem wan Natapoa tri we hem e talem se L’Avatao e stap long hem, oli no shoem nakamal. Hem e shoem wan yang Natapoa we hem e talem se hem e ples blong nakamal blong Vutlath. Nogat man e challengem pasis long klem blong hem.

FINDINGS BLONG KOT.

Santo/Malo Aeland Kot e bin sidaon blong six days long kes ia. Afta long lukluk blong Kot long klem blong wanwan patis Kot ia hemi bin harem ol evidences ikam from 6 patis wetem 15 witnesses blong olgeta. Kot hemi notem olketa particularities blong land kes ia se:

1. No matta olgeta patis oli no luksave olgeta but family trees blong olgeta e showem aot clear Warpocpoc mo Jif Mel Alick oli related long woman;
2. Iarvcut Noel mo John Pore oli klem Locmar kastom graon;
3. Land dispiute ia hemi indirectly related long raorao blong skul we istap long last part blong sketch map blong John Pore;
4. Noel Thucula e no provum hem long graon blong Locmar;
5. John Pore hem e provum hem long graon blong Locmar;
6. Locmar hem e wan differen kastom graon mo L’Avatao o Witateteno hem e wan different graon;
7. Locmar e finis long flat ples we Saul Tarr e wok long hem.
8. Kot bae e no mekem eni desisen long graon ia L’Avatao or Witateteno. Olgeta patis we oli klem graon ia oli mas go long wan nara kot.
9. Baonderi blong kastom graon Locmar e stat long wan stamba blong Nanagai long West long fenis blong buluk blong John Pore e go kasem North long wan stamba blong Nangai. Ples ia e baondari wetem Seri Tu graon. Long North Locmar e baonderi wetem graon blong Morris Tull. Long South graon ia e baondari wetem graon blong Pasvu.

DEKLERESEN BLONG KOT.

Kot hemi deklerem se John Pore nao hemi indigenous kastom ona blong Locmar baondari we e stat andap long tufala Nangai tri we e baonderi wetem Seri Tu mo e kam kasem namba tu flat ples we Saul Tarr e wok long hem. Olgeta direct bladlaen descendants blong Warthele oli also bikam kastom onas long olgeta graon blong olgeta.

Original Klemen – hemi wan direct bladlaen descendant blong Warthele mo Kot hemi deklerem hem kastom ona long graon ia Locmar.

Kaonta Klemen 1 - Philip Pasvu hem e klem L’Avatao we e stap aotside long graon ia Locmar

Kaonta Klemen 2- Romel Alick hem e klem L’Avatao we e stap aotside long graon ia Locmar.

Kaonta Klemen 3 – Rex Warpocpoc hem e klem Witateteno we istap aotside long graon ia Locmar.

Kaonta Klemen 4 – Family Warput & Timmy hem e klem L’Avatao we istap aotside long graon blong Locmar.

Kaonta Klemen 5 – Iarcut Noel hem e klem Lotcurn be hem e no save pruvum hem long kastom identity blong hem long Lotcurn we tedei graon ia hem e Locmar.

Eni wan we e no hapi long desisen we Kot ia e mekem hem e gat rait blong mekem appeal anda long section 20 blong Aelan Kot Act bifo long 30 deis.

Judgment ia Aelan Kot hemi mekem long Satede 5 Septemba 2020.

………………………………. 

ACTING JIF MAJISTRET
LALOYER. A. B
Presiding Majistret

………………………….

JIF SAM VULA
Jastis

……………………….
JIF VICTOR ANDRE
Jastis

…………………………
JIF PETRO RITE
Jastis